Binyat u Vegotin

Binyat û Vegotin : Awireke Teorîk Li Çîrokê Ji Weşanên Lîsê Derket!
"Çîrokek, bi tenê xwe venabêje; ava dibe, dadihûre û ji nû ve tê xwendin."

Ger çîrok avahîyeke ji bêjeyan lêkirî be, têgihaştina wê jî dê bi fêmkirina avahîsazîya wê pêk were. Pirtûka Binyat û Vegotin : Awireke Teorîk Li Çîrokê, çîrok bi kîjan rêbaz û rêgezên binyatger û dozîneya vegotinî tê raberkirin wekî teorîk û rêberekê nexşeyeke çîrokê ji dilxwazên xwînera wêjeyê re pêşkêş dike.
Yaqob Tilermenî bi vê pirtûkê kevirên takêşî û binyatgerî, ne bi zimanekî hînkerî; bi feraseteke dahûrînî, lêpirsînî û tatêldarkirinî nivîsandiye. Dema vegotinê, bergeh, çeşna wêjeyî ya zîbeqî, lihevanîna rûdanî, navlêkirin û pênasekirina civakî û wêjeyî; hem li ser zanîna teorîsyenên klasîkî hem jî bi mînakên çîroka Kurdî ya nûjen raber dike.
Her wiha, beşa salnameyê, çîrokên sê salên li dû hev wekî parçeyekî kovar û pirtûkan di parzûnekî dozîna vegotinî re dinizilîne û dinirxîne. Bi vî awayî xwîneran ne bi agahîyên req ên teorîkî bi tenê, bi hişmendîyeke bîrmendîya wêjeya îroyîn jî, nîşeyan ji pirtûkxaneya Kurdî re dinivîse.
Xwendekarên wêjeyê, kesên li ser rêça çîroknûsînê û xwînerên miraqdarê têgihaştina çîrokan a kûr û dûranî dikarin der barê vê pêşanîyê de feraset, pirs û bersivên cihêreng di nava rûpelên Binyat û Vegotin : Awireke Teorîk Li Çîrokê de peyda bikin.

Yaqob Tilermenî • li Qosera Mêrdînê ji dayik bûye. Ji salên 1995'an û vir ve bi zimanê Kurdî û ji salên 2022'yan vir ve ligel zimanê Kurdî berhemên xwe bi zimanê Fransî jî dinivîse. Tilermenî ligel nivîsandina wêjeyî, xebatên sinema, şano û wênesazîyê jî dike.

Berhemên wî:
Êşbazî, Çîrok (Weşanên Sî 2002)
Bermeqlûb, Çîrok (Weşanên Elma-Pirtûkên Mîr 2003)
Ferhenga Sirgûnê, Çîrok (Weşanên Lîs 2004)
Kitim, Roman (Weşanên Lîs 2005)
Qerebafon, Roman (Weşanên Do 2009)
Bavfileh, Roman (Weşanên Do 2009)
Kulîlkên Apê Mûsa, Şanonameya Zarokan a Muzîkal (Weşanxaneya Zîbeq 2012)
Kermêşa Gerok, Novela Ciwanan (Weşanxaneya Zîbeq 2012)
Danişîna Zimanekî, Şanoname (Weşanên Şaredarîya Bajarê Mezin A Amedê Şanoya Bajêr 2012)
Lemişta Çîrokên Kurdî, Salnameya 2012-2013-2014an (Weşanên Na 2015)
Metamorfoz, Çîrok (Weşanên Na)
Sergotina Calvino, Roman (Weşanên Avesta 2013)
Hêlange, Roman (Lîs 2016)
Pizdank, Çîrok (Lîs 2018)
Qerebafon, Roman (Lîs 2021)
Bavfileh, Roman (Lîs 2021)
Şevhilat, Roman (Lîs 2023)
Moustique Voyageur I, Novela Ciwanan Bi Fransî (2024, Vérone Éditions)
Binyat Û Vegotin - Awireke Teorîk Li Çîrokê, Wêje-Rexne (Lîs 2025)

Wergerên wî:
Rojda, Özcan KARABULUT- Çîrok Ji Tirkî (Lîs 2005)
Cam û Kevir, Şükrü ERBAŞ- Helbest Ji Tirkî, ligel Dîlber HÊMA (Lîs 2005)
Bêbaran, A. Hicri İZGÖREN- Helbest Ji Tirkî, ligel Lal LALEŞ (Lîs 2005)
Dansa Berber, Sirri Ayhan – Roman Ji Tirkî (Weşanên Na 2015)
Aso, Fatma Köl – Roman Ji Tirkî, (Lîs 2020)
Dûvpişk, Eşber Yagmurdereli – Şanoname Ji Tirkî Bo Lîstinê

Binyat Û Vegotin - Awireke Teorîk Li Çîrokê
Yaqob Tilermenî
Wêje Rexne, 176 rûpel
Cotmeh 2025